अचम्मला ङाङ ह्रिबासे सेम खुल्दुल !

प्रिय, होइस्हेर ए खाजिबाई ग्लारी खातामान अवस्थारी मुर्साई ज्याबा तागाइ सेमन्हाङ ह्यान्छेला ज्याबा डान्बा । होइस्हेर, ह्युल्ला स्ह्याला पोबा ताङरी सोबारी जे तासाइनो ए, ङा ह्राङ-ह्राङला थुमरी ब्यस्त ताबासे लामा रुप आताबानो ल्हानान तासी जिन्जीम । थेतासी ताम्सालिङ स्योस्योला मायाला न्हानला सहरा किन्बान एदा रुप ताबा सेम लाबा मुला आज्याबा आडान्गो ह्या - दिङसे दुइला चक्र क्युरसी छारदिङरी ओङसी जिन्बा मुुला । एदा थाहानोन मुला बुद्ध सम्वत् आन्सार ह्याङसे छारदिङला रुपरी ल्होछार दाङसाइनो विक्रम सम्वत बिमा ङ्हाच्छान चन्द्रतिथि आन्सार नेपालरी बुद्ध सम्बत् शक सम्बत् नेपाल सम्बत् ह्राङबा ल्होलो-ल्होलो सम्बत मध्येरी नेपालला एकिकरण लिच्छा सौरदिङरी आधारित तासी विक्रम सम्वत्दान राष्ट्रिय मान्यता पिन्सी बैशाख १ रेकुनुदा छारदिङला रुपरी दाङबा मुला । तिनी खाइ तिल्दा-तिल्दा एदा डान्बान छारदिङला परिबेशला ङामरी टिसी तिलाई ब्रिगे मान्मु । छारदिङलान दुइसाङरी ह्राङला म्हि, ह्रोकादेला गुङरी ज्याबाडान्बा दोन्बा, डाङ दोेन्बानोन चलन मुला । तर होइस्हेर छारदिङरी ङाइ याङबा डाङ विसाम खालाइसे खालाइदा दोन्बा ङाङविमा साः मुलान फरक छोर्बा मुला । खाजिवाई स्हेला मुल्यांङ्कन लासी च्याबारी माइबा ङाला सेमरी चु डाङदा ङाला ल्हुइला, ङाला सेमला दोङरापरी म्हार मुइला छिगसे बिसी थन्सेला मुला । थाहा आरे म्हिसे कादे गोमुग्याम डाङला साइ, डाङला महत्व थे अनुसन्धान लाबारी बाँकी मुला । ह्रिबासे, दोन्बासे खाइ खाह्राङले डाङ ह्रिजी/दोन्जी तर अचम्मला डाङ ह्रिबासे चु डाङ च्यामा जो खालाईला सेमरी खुल्दुली ताबारी खाम्ला ।

ल्हुइला ग्यालामरी काङङ्िहसे ख्लाबा गोङमाला ज्योइकादे म्लेसी निला, मासी निला तर चु डाङ ल्हुइलान म्लेबारी आखाम्बा स्हेन्होर दोबा मुला । साँच्ची होइस्हर, एदा तामगी ङ्योइगे मान्जी, होइस्हेरला अर्थ प्रकाश ओच्छेम प्रकाशला अर्थ होइस्हेर ताबा मुनाम आहिन -

अर्थात तामाङ ग्योइरी प्रकाशदा होइस्हेर बिबा लामुनाम थेतासी एदा ङाइ होइस्हेर बिसी संबोधन लाबा, ङाला छाननो पोसी थान्बा बिसी-बोमो आलासे ह्या -

०६४ सालरी बिसाम ङाइ खाइमाइ, खालाइग्याम आयाङ्बा अचम्मला डाङ याङबा मुला । होइस्हेर थे डाङदा ङाला ल्हुइला, ङाला दिङला दात्तेदोनाला खाप्पाई बिमा ग्रेन ओच्छेम महत्वपूर्ण डाङ डान्बा मुला ङाइ । एदा खुसुक्क पाङगे ह्या - चुह्राङबा मुबा ङाइ याङबा डाङ 'आइ आइएम गोइङ टु म्यारी नेष्ट विइक, दिस इज इन्भाइटेसन फर यू, प्लिज भिजिट स्मलपाटी ह्याज विन अररेन्ज फर स्पेशल प|mेन्ड लाइक यू, नो निड टु ब्रिङ प्रिजेन्ट बट डन्ट फरगेट टु ब्रिङ वान थीङ फर एक्जाम्पल अ गर्ल टु म्यारी मि' कादेसे उदेक ङ्हाम्ला ताला चु सन्देश थेन निमन्त्रणादा । थाहा आरे होइस्हेर ङादा चुह्राङबा डाङ एसे तिल्दा ह्रिजी - तर ङादा थाहा मुला होइस्हेर थे रे, थे दुइ, थे रेकुनुला म्हुना याम्बु पोकोलरी म्हुनागी नाम खाबा मुबा । लिच्छाकुनु स्योरी बिसाम बैशाखला ला तासाइ सेमनोन सिल्सिल्बा लाबाला छ्यामरी चराकादेला काइरी ङा छोर्मा सिंगुन ङेसी टिबा मुबा, झयालग्यामसे बगैंचारी मी दोमा वर्ण्र्ाालाबारी आखामा ङाइ गुलाब म्हेन्दो स्यान स्यान म्हेन्दोकादेला गुङरी इन्द्र कँवला म्हेन्दोकादे बास्ना ठाम्सी ङेबान मुबा । ङाला सेमसे मान्जी ङादा भोजरी ङ्योइसी अचम्मला डाङ ह्रिबा ह्रोदा ओहो थे मगमग बास्ना ठाम्बा तारतारबा कँवाला म्हेन्दो वा डाङला रुपरी दोन्गे विसी सेमसे मान्बाला मान्बान लाजी डान्बाला डान्बान लाजी तर ह्रिबा डाङ थेन कँवला म्हेन्दोला तुलना लाबारी आखाम्नी ङाइ । हिन्बामी होइस्हेर, ङाइ याङबा निमन्त्रणा थेन डाङदा हरेकला मिसे, हरेकला सेमसे ल्होलो-ल्होलो तर्क समिक्षा लाबारी खाम्ला । खालाइदा फो स्हुखाना ङेबा जोक तावारी खाम्ला, खालाइदा अनेक ताबारी खाम्ला तर ङाइ म्हान्बा मुला गोर्गी ह्रोसे स्यान ह्रोदा लाबा विश्वास थेन हार्दिकता हिन्ना चु । हिन्बाम म्हेन्दोला बोरी होइस्हेरदा लानी, उषा, रोशनीनोन तोला ताला थेतासी तिनीन्हाङगार ङा एसे माइबा ह्राङबा सेम्जो माइबारी व्यस्त मुला ।

दात्ते भौतिकता थेन आधुनिक जमानाला लिच्छा छ्योङबारी व्यस्त म्हिकादेला गुङरीनोन ङादा बिसाम चु विषय मननयोग्य छोर्बा मुला । र्ङाई याङबा डाङदा गहन विषय डान्बामुला । एसे पिन्बा डाङदा सेमला कन्तुररी ताल्चा लासी खालाइदा आङोन्ना थान्बा मुला । दुइ दुइरी कन्तुर ठाङसी च्यामा सेम दंग ओच्छेम फुरुङ्ग ताबा मुला । डाङ च्यासी गोसी बामा ङाला सेमला औसतसे आख्यूप्पा साः मुलिङला परिधी ह्राङनोन छोर्बा मुला । हिन्बाम दात्ते ल्हाना आधुनिकताला कारण ज्याबाडान्बा किन्बा पिन्बाला ताङरी अशुभ सेमसे घाइते शुभकामना बो लाबा ताङ न्हेबा म्राङबा मुला । ओत्ते जे आताना मायाप्रेमला ऐनारी मकुन्डो कुबा स्ह्याल ओन्सी नाटक क्लाङ्बा अवसरबादीकादेनोन च्याङना आरे । बिनोन तोमा होइस्हेर, स्ह्यालरी ज्युुम ङेबा थोसी सेमरी छलकपटला पोरे जोर्बाकादे खाजिवाई ह्रोला शुभचिन्तक तावारी आखाम । तासाइ डाङला हिसावकिताब आरेबा दुइरी क्युइ मंहगो मिख्ली सस्तो ताबा चु दुइरी एला डाङदा क्युइला लिङ मान्बा मुला होइस्हेर । एदा डान्बा मुला ताला र्ङाई आजिबाई रेरी गोर्गी सूचना पिन्बा मुबा तर आज्याबा सेमसे आहिन । ङाइ एला भावनादा गोङमासे नाङबारी माइबानोन आहिन, एला सेम कोइसी एला तिङरी सार्बा मायाला सुनगाभा टाङबा रहरएन आरे ङाला । एसे गोला ताला होइस्हेर, सेम थेन मायाला आँखीझयाल ग्यामसे च्यासी एदा ङोबारी माइसी एला ल्हुइला वास्तविकता लोङबारी माइबानोन आहिन । मिख्लीला सस्तो चु ल्हर्ुइ एसे बिबा ह्राङनोन चोटनोन चोट, स्हुनोन स्हुला ल्हुइ थादोबान म्हिला नियति बिबा ताम ल्हाना च्याङना गोबा मुला होइस्हेर । ह्रो ह्रोसे ह्रोला सेमताम स्वतन्त्रतादा सम्मान लातोला, ह्रो ह्रोगुङरीे हार्दिक सहिष्णुता तोला बिबा जे ङाला सेमताम हिन्ना । ह्याङला ङोेसेबाला साइनो थारेङ आतागाई लाबा खाला नाम खाला चिनजानला सम्बन्ध आफ्याङगाइ होइस्हेर । एला ङेम्बा सेमदा ग्यागारदेस्याला पुजुसे ह्राङ ब्लोसी स्हुखाना लाबानोन ङाला सेम आहिन होइस्हेर । एसे आगोजी ताला ङामी ल्हुइला दोभानरी सुनसान उराठ बगरला बालुवादान ह्राङला ल्हुइला जाम्बुलिङ मान्बा बैरागी हुटिट्याँउदा ल्हुइला दुवाँला प्रासाल्बा म्हि हिन्ना । तासाइ 'आमान्गो एसे गुनासो चु, मिख्लीरी छ्याबा तिङला स्हु' एकलासे बगररी ह्राङ खालाङतामन सेमला दुवाँल प्रासाल्बारी उचितनो ताला बिबा तिगाइ आरे आहिन र - एसे आमान्गो ङाला दुवाँल थेन एला ताङबा देप्पारी बाङ लासी एला सेमला रहरदा साइवारी माइबा ङाला अभ्रि्रायः पक्कन आहिन होइस्हेर । क्युइबा सेमदा दात्तेदोना आख्लाना ह्रो लाबा बैशाखीला रुपरी मुबा ङाला मुठ्ठीनाङ प्राणसे ह्रो लादेदोना खालाईला सेम खाम्देदोना स्हुखाना आलाबा ङाला सेम मुला । गोर्गी आज्याबा बानी तिला बिसाम खाइमाई च्युप तासी टिबारी आखाम्बा सुङ । थेतासी एथेन ङोसेबा ह्यान्छे दात्तेदोनाला यात्रारी ङाग्याम थेह्राङबा तिलाई गल्ती ताबा मुसाम चुनोन चिठ्ठीग्याम या पी पी च्युइ थुइसी माफ ह्रिला होइस्हेर । सरल, सौम्य चौमुखी प्रतिभा एला मिनरी ब्रिबा चु पत्ररी ब्रिगुला मसीथेन छ्याम ङाला भावनानोन ठाम्जी ताला सम्हालाप लोनोन तोला बिबा तिलाई आरे । मुठ्ठीनाङ सास थेन मुठ्ठीनाङ आश मुदेदोना बोली थेन विश्वास वन्धकी थान्छीनोन एसे ह्रिबा डाङ माइसी एदा बुझाप लावारी बाङ लासेला मुला ।

लिच्छारी ए थेन ङाला लागिरीनो चु पृथ्वी क्युरबा हिन्साम खाजिवाई गोलार्द्धरी रुप ताला तिनीदा फेगे ह्या.......

एलान सेमला ङाम ङामला ह्रो छ्योइकु