Premier web site dedicated to Tamangs all over the world

याम्बु । जातीय स्वशासन आत्मनिर्णय अधिकार तेन दारेम ताला बिबा संविधानसभारी जातीय जनसंख्याला आधाररी समानुपातिक निर्वाचन प्रणाली तोबा माग लाबान खाबा नेपाल आदिबासी जनजाति महासंघसे दाप्पेन आन्दोलनला घोषणा लाबा मुला ।

महासंघसे आन्दोलनला ताङरी चुनोन जेठ १८ गते तेन २७, २८ री समेत नेपाल बन्दला घोषणा लाबा मुला । नेपालला आदिवासी जनजातिकादेसे २०५६ सालरी याम्बु महानगरपालिका तेन धनुषा नगरपालिकारी सरकारी कामकाजी ग्योइला रुपरी नेपाल भाषा तेन मैथली भाषादा प्रयोग लाबारी म्याङतोला बिबाला विरुद्ध सर्वोच्च अदालतसे लाबा निर्णय बिरुद्ध म्लाङरे (कालो दिवस) ला घोषणादा अर्थपूर्ण रुपरी किन्बा मुला ।

निवा रेरी औपचारिक गेताङरी चेक्खेन सीमित तासि खाबा चु जेठ १८ चुपाल्से बिसाम ग्रेन आन्दोलन लादासि दाङबा योजना महासंघसे स्होबा तामसोर मुला । जेठ १८ ला नेपाल बन्द गेताङदा सफल तानालाबारी दात्ते ह्यान्देन महासंघसे व्यापक प्रचार प्रसारला ग्याम चुङबा मुला । १८ गतेला गेताङला तयारीला रुपरी महासंघसे चुनोन ३ गते याम्बुरी विशेष र्‍याली तेसेदा ताबा मुला । र्‍यालीरी महासंघसे स्यान दुइरी बिमा ल्हाना आदिवासी जनजातिकादेदा सहभागी लासेदा ताबा मुला । थेला लागिरीनोन महासंघ व्यापक तयारीरी वाङबा मुला ।

१८ गतेलान गेताङदा सफल ताना लाबारी १० तेन ११ गते माइतीघर मण्डलारी धर्ना गेताङ समेत स्हेङसेदा ताबा मुला । धर्ना गेताङ स्यान दुइला गेताङ बिमा शसक्त तासेदा विदासिन महासंघसे पाङबा मुला । निवा रेरी सिंहदरबार घेराउ गेताङरी प्रहरी हस्तक्षप ताबासे लामा थेराङबा संभावना प्रवल म्राङबासे प्रहरी हस्तक्षेपला प्रतिरोध खाराङ लादासि लाबा बिबा तयारीला समेत विचार विमर्श ताबान मुबा जानकारी ताम्सालिङदा याङबा मुला ।

महासंघसे १८ गतेला नेपाल बन्द गेताङला अन्तिम तयारीला रुपरी १७ गते याम्बुला ल्हानान ग्लारी मसाल जुलुस तेसेदा ताबा मुला । १८ गतेला नेपाल बन्द लिच्छा दाप्पेन २७ तेन २८ गतेला नेपाल बन्द सफल ताना लाबारी विभिन्न गेताङकादेदा निरन्तरता पिन्सेदा विदासि पाङबा मुला । २७ तेन २८ गतेला याम्बुला ग्ला-ग्लारी मसाल जुलुस गेताङ स्हेङसेदा बिदासि पाङबा मुला ।

सरकारी वार्ता टोली तेन महासंघला वार्ता टोलीला गुङरी चुनोन वैशाख २२ गते वार्ता तासाइ बिना निष्कर्षथुम्बा मुबा । तत्कालिन वार्ता टोलीला संयोजक मन्त्री महन्थ ठाकुर तेन ङहीरेम दोना वार्ता लार्साई बिना उपलब्धि महासंघला वार्ता थुम्बा मुबा । दात्तेला वार्ता टोली तेन २२ गते ताबारीनोन सामान्य परिचय चेक्खेन तादासि वार्ता थुम्बा मुबा ।

दाप्पेन वार्तारी टिबारी ङहोइला विदासि फेबा जामाला वार्ता टोलीसे दाप्पेन तिलाई खबर आलाबासे महासंघसे चु आन्दोलन लातोबा हिन्ना बिदासि महासंघसे पाङबा मुला । चुर्सेपट्टी महासंघसे विभिन्न आन्दोलनला घोषणा लासाइ सरकारसे तिलाई प्रतिक्रिया पिन्बा आरे । सरकारसे वार्ता ग्याम्सेन समस्या छाङना लाबा विदासि पाङसाइ सरकार वार्ता ग्याम्से समस्या छाङना लाबा बिमाइनोन जनजातिदा अलमलब लाबारी चेक्खेन वाङबा आरोप जनजातिककादेसे लसि खाबा मुला ।

सरकारसे वार्तारी दाप्पेन ङहोइला बिसाइ खाइमा ङहोइला बिबा ताम निश्चित ताबा आरे । चुला कारण ह्युलरी दाप्पेन जनजातिसे ग्रेन आन्दोलन लासेदा तामरी निश्चित ताबा विदासि पाङबा मुला ।

सरकार जनजातिला मागप्रति गम्भिर आताबा ओम ब्रे दलसे तानाशाही व्यवहार उन्गे लाबा बिबा समेत जनजातिसे आरोप लाबा मुला । जनजातिला मागदा सम्बोधन आलाना हयुलरी स्थायी शान्ति ताला बिबा तामरी असंभव मुबा दावी समेत महासंघसे लासि खाबा मुला ।

जनआन्दोलन २०६२-०६३ लिच्छा जाजाबा निउरीन आन्दोलन तासी खासाइ महासंघसे तिरेमरीम चुराङबा ग्रेन आन्दोलनला घोषणा लाबा बिसाम चु खाप्पाइ बिमा ङहाच्छा आहिन । महासंघसे चु बिमा ङहाच्छाइ नेपाल वन्दला छ्यामरी स्यान-स्यानगेताङकादे स्हेङबा मुबा बिसाम निबा वार्ता बिमा ङ्हाच्छा अनिश्चितकालिन उपत्यकारी नाका बन्दी लाबा घोषणा समेत लाबा मुबा । सरकारी वार्ता टोलीसे वार्तारी ङ्होइबासे लामा थे आन्दोलन स्थगित लाबान वार्तारी टिबा मुबा ।

दारेम सरकारसे वार्तारी योनान ङहोइसाइ ह्राङला मागदा वार्ताग्याम्से पिन्बा अनिश्चित ताबासे महासंघसे वार्ता विमाइनोन आन्दोलनलान ग्याम चुङसेदा ताबा मुला । सरकारसे आश्वासन चेक्खेन पिन्बासे दारेम वार्तारी टिदासि दुइ खेरो व्याङबा विमाइनोन आन्दोलनदा निरन्तरता पिन्सेदा विदासि महासंघसे पाङबा मुला ।

ताम्सालिङ अनलाइन डट कम ला लागीरी तेबा ग्रेन डिक्खेन जगतमान लामा, डिक्खेन कुमार मोक्तान, ह्रो डिक्खेन श्रृजना गोले, प्रतिनिधि खड्ग मोक्तान, बजार विश्वोर दोङ, ह्रोलाबा चन्द्र दोङ, सल्लाहकार डा. गणेश योञ्जन, अमृत योञ्जन, कानुनी सल्लाहकार अधिवक्ता कुन्साङ योञ्जन, प्रबन्धक अम्बर बम्जन तामाङ ।

प्रायोजक थेन वेभ मास्टर मुकेश लामा, याम्बु, नेपाल ।
E-mail: ceo@tamsalingonline.com