कवि गोष्ठी फिरी तुन्बा समिक्षा

ह्युलला कैरन

- गोले केआर चालिसेली

बोइ हृयुल सङग्याम्
तफिरि ख्रोसी हबा
'तमक' कदे
'तामाङ' दोबा धुइरी !
ङ्हन्बा मङ्ला छिन्से
जिना-जिनान !
टिन्ना-टिन्नान !
खण्डु तबा म्रङ्जी
आखे म्हेमेसे
स्हेङ्सी थन्बा
थेन,
दोङरप/सेरप/कैरनकदे !!

तिनि मर-मर
ग्यगरजारी
मे फुइसिमाम्
बोगाल गिसेन् ङा
म्हेन्दोकदेदा
गौर जोङ्रीक्यर
ख्रङबै म्रङजी !
याङलान्
बुसिङ्ला स्या
बो लबै च्याजी !
सिम्बुला
धुसारी लुङ्बा
मे ल्हामला यालरी !
ओम मानी पद्ये हु“ला
मोलम/मन्त्र दोबा
याङ सेल्गी दोङबो
मयुङकदेसे !!

बेथानला बुसिङ
दीलमायादा
हल्से डेन लजी हई ?
दोरम्बा हत्याकाण्डला
शहीद बाबुरामला
दिम्बासे
विधायकला कुर्सी
धरेम् हइमई
म्राङसेला आरे !
नगरकोट
हत्याकाण्डला
लिसो नम्दरकदेमी
दरबार हत्याकाण्डदेन
डिक्सि निबा चु धुइरी !!

खनियावास
हत्याकाण्डकदेदा
ह्युल्बासेन्
म्लेबा चु धुइरी
ताम्सालिङदेन
तामाङ ग्लेकदेला
रानी ध्योईरी चेप्सी निबा
सत्यमान/कमानसिङसेन्
म्लेसी झिन्बा
दोङरपकदे !
हनङ निसि र्म्हईला तला
कुमारी मोक्तानकदेसे !
पिपा/ढोके/छाते/हुक्केला
नम्द र ब्रिबारिन्
तखारबिमा कोङ्बा
थेला ब्रिगुला
मसी बेबा चु धुइरी !!

ताम्सालिङ मजि
ह्रुइ/ग्योई/गोईलो
रिमठिमगेन मजि !
कुइरेजाला
रिमठिम ल्हेजी !
बैरीदा ओन्बारी
हला ढाढा लसी
झ्योझ्यो/आले
नाना/आङा
छेजी/थाजी/सेजी !
क्युइ फुइजी बिसी
का थुङ्जी म्हन्ज्यारी तासी !
काला लङ न्हङ् ग्यम्सेन
गोम्बोरी
छ्यागो लजिरो !
तोर-तोर
सिम्बु/बौद्घरीकयर
छ्योमेएनोन् म्रसिमाम्
फ्रेङ्बा माला
ज्याबा धुइरी
सिम्बु/बौद्धला छ्योर्तेनरीम्
छामे/ब्योनला...
ह्रई ?
छिग अस्याप्नी ङै !!

कल्बा/दङ्बोरी
चु सा छ्यास्दिबा
दोँरप/सेरप/कैरनकदे !
तिनाउ स्योङरी स्यप्पा
करोड गिसेन् च्युइलाख
दिङ ङच्छालान्
रामापिशेकसला
ङ्योम्लो कमफिला स्वादाम्
डन्बा/सल्बा आरेरो !
नवलपरासी जोङरी
र्म्हईसी/ट्वाईसी/स्याप्सीबबा
Peking Man  ला
Lower Palaeolithic
ल्हाजेदा ङ्योईमाम्
चीनग्याम्से चुरी
ग्लिङ वाइसी हबारो !

यम्बुला कुग्याम्से
कुरिसि-कुरिसि
बागमतिदेन माया
देप्पारि निबान लबा
धोवी स्योङ्ला
कुनिखियर स्यप्पा
बोगाल गिसेन च्यूइ दिङ
ङाच्छालान
ल्होजेकदेथेन !
नक्खु स्योङरी स्याप्पा
म्हि ल्हुइला
हुइसल/नखु्रकदे !
हेराङ ग्यल्जाहेन्दे
काभ्रे/झापारीक्यर स्यप्पा
तोङजा च्युइहेन्दे
तोङ्जा ङसि् इ.शा. ङाच्छाला
ल्होजेसेम
चु सा ह्रोसेन
छ्यस्दिबा हिन्बारो

मङ्गोल/चीन/भोटग्याम् हसीमाम !
ओन्मा/कल्वा/दङबोरी
थे बिबा तामाङलान
नम्दरला टा हिन्नारो !

होशियार/खबरदार
तामाङकदे !
कैलाश/बढुनिलकण्ठजे अहिन
सङ्गे च्योम्देन्देएनोन्
होन्न् विष्णुला औतार
बिला झिन्जी !
जोरङबसेम्
न्हङ्गर्ला दिङरी स्यप्पा
१३.१ से.मि. हे्रङ्बा
२.७ से.मि. ब्लक्पा
म्लङ/वला/खैरो र·ला
युम्बाला
तोक्जेबा ल्हाजेएनोन्
ङ्हन्बालान् बिजि बिसम् ?
ग्यर्जा ङि सेन्
गङसल दिङ् ङाच्छान्
ताम्सालिङ व्यन्सियाम्
पिपा गोश्वारारी
च्युप्सी थन्बा तामाङकदे !!

भिमफेदी हेन्दे
सिङ पुइसिमाम्
यम्बुरी
केशर महल स्हेङ्बा
तामाङ कोलाकदे !
राणाला
गाडी पुइमा बम प्लुत्याला
स्हुहुकदेम्
आखे म्हेमेदेन्
गङ्री बोर्सी ख्रङबा धुइरी
सीता महारानी भ्लोनला
नम्दर/कैरनकदे
बेनासेन् म्लेलाझिन्जी
बेला झिन्बा
थेन,
सन्तबीर लामाला
नङवा सङ्गेदा  ह्रङ् !!

नङवा सङ्गे ब्यङ्सी
ह्रोङबा सङ्गे चुजी !
तामाङदा वैश्य स्होबा
ङ्हन्बा सङ्गेकदे
तामाङलान्
थोपोफिरक्यर
स्यबान् मुला
रोशी स्योङला घट्टा ह्रङ
ख्वाइ ! ख्वाइ !!
छर ह्युल ठिम
स्हेङ्बा चु धुइरीक्यर !!

रेगो धरेम्/छोर्गो धरेम्
अइरक/झि चा ब्यङ्गो धरेम् !
 

लोप्खाङ्री पुइगो
जा/जामे
न्हङ्गर्ला थेन
खम्बाकदे !
म्हिजाला
ग्योई/गोईलो
रिमठिमदा ब्यङ्सीमाम् !
ह्रङ्लान्
ग्योई/गोईलो
रिमठिमदा ब्यङ्सीमाम् !
ह्रङ्लान्
ग्योई/गोइला
रिमठिम चुगो धरेम् !
ताम्सालिङ बबारिम्
तामाङ दोसी सोसी च्यागरे !
तिङ न्हङरी
तामाङला
स्या/कर, मुला/आरे
ओर्सी धरेम् रोसी च्यागो !!
तामाङ दोसी सोसी च्यागो !!
जातीय स्वशासनला
ह्वाई स्हेङ्सी गोर्सी च्यागो !!!

(सोम्छा तामाङ राष्ट्रिय कवि गोष्ठिरी ङि्छा ताबारी सफल ह्वाइखा ।)