कवि गोष्ठी फिरी तुन्बा समिक्षा

मिख्लीला ल्हुइन्हाङरीनोन समाजसेवारी समर्पित

सेमसे आँट लाजी, बाङ लाजी विसाम खालाई म्हिसे खाजिवाई गे लाबारी खाम्ला बिबा उदाहरण हिन्ना चुवाकोट जोङला कमला लोप्चन । २०६२ साल ह्यान्दे याम्बुला नयाँबजारला धारा गल्लीरी श्री मुक्ति बालकल्यान केन्द्र बिबा गोरगी समाजिक गेन्दुन ठ्वाङसी पूर्णरुपरी समाजिक गोरी वाङस्युबा कमला लोप्चनला ल्हुइला निबा दिङकादे विसाम च्याङना दुवाँलसे प्लिङबा आरे । स्योरिन कमलाला गेदिम नयाँबजाररी चु पंक्तिकार टुप्लुक्क दोमा कमलादा लाइनु कोलाकादेसे गिनोन काइरी 'गुड मणिर्ङ मदर' बिमा ज्युम ङेबा ओछ्यान कमलासे ल्हेङमोला ताङरीन मिख्लीला फुम प्रुलुलु पित्बा मुबा । कमलाला ल्हुइला संघर्ष म्राङमा जो खालाइला सेम क्राबारी खाम्ला । २०२७ सालरी नुवाकोट जोङला भुङताङरी केवा किन्स्युबा कमला आपा आमासेन आगोबाला कारण जन्ती बिबा तिला बिबा थाहा आयाङजीमान च्युइसेसोम दिङरीन कमलदा थाहा आपिन्ना केवा दिमसे थारेङ बुद्धिमान तामाङला यारी प्रात्छी पित्ची । नाम्साला जागिरदार जहान मुसाइनो बुद्धिमानसे सत्तान जि आइरकसे ह्योइसी तोबा नाङबाला ताङरिन कमलासे जामेेदा केवा पिन्जी । थेलिच्छा ङहिाच्छा कोला जेठ लारी ग्रेन जा याङबा बिसी म्हेम्मेसेन हेला लाबारी वाङ्जी । मिग्याम मिख्ली पित्पान कमला तिलाई दुइ स्तव्धनोन ताबा मुबा । थेला व्यथा कथा म्रिख्लीसेन पाङबा मुबा । कमलासे क्राबान सुङबा मुबा '२१ दिङरी जहान थेन दिमम्हेमेला बुहार्तन नाबारी आखाम्ना र्ङाई लाइनु कोलासोम कुरी थेन गोरी पुइसी ल्हुइ ङ्िहला र्-गर्भवती) ल्हुइ थोसी दिमसे थोन्छी दिमसे थारेङ मुबा बु ह्रि थेन स्योङकुनीरी फोमसिं थेन च्यान-च्यानसे रोत्सी छाप्रो स्होसी ल्हुइला रे पित्परी वाङजी, दैवला खेलनोन थेह्राङबा सावनला झरी थेन ङाइ खसुला थोप थोपरी थेनोन छाप्रोरी च्याङबा कोला केवा पिन्जी' रेएनदाङसे बनि लावारी नाङरी नितोबा कोला ब्लि-ब्लि न्हातोबा कमलादा दुःखला रे काप्पान निजी । मिख्लीलान ग्योइरी कमलासे सुङजी 'लाइनुकोला थेन ङा सावन भदौला नाम झरिसे बाम्देन बाम्जी स्याउलाला छाप्रो ब्रेबासम्मन ब्रेबा मुबा सुत्केरीला दुइ फोइथानसे योङयोङ ताबा थे रेकादे ङाला ल्हुइला बेनान बिमा दुवाँलला दुइ हिन्ना' ओत्तेजे आताना थे दुइरी कमलाला दुःखरी ना दिमथेमेसे ह्रो लाजी, ना माइतीग्यामनो ह्रो याङजी । ५ दिङदोना कमलासे थेनोन छाप्रोरी रे पित्ची । ओत्तेदोना कि हेलासे कमलासे याङबा कोलाब्लिला ना न्वारान सुर्त्ताई आलानी बिसाम साइत च्यासी खाजीबाइ कोलादा काननोन आख्वानी । छ्यामरी २०४८ साल ह्यान्छे दिमथेमे जहानथेन फेसी टिबा कमलासे दात्तेदोना सम्बन्ध विच्छेद लाबारी माइसाइनो सम्बन्ध विच्छेद ताबा आरे बिसीनोन कमलासे सुङजी ।

दुइ निबान लामा गोल्छेन नाम्साबाला ह्रोरी कमलाला कोलाकादे छार्बान निजी । मिख्ली न्हाङला कमलाला समसे राइदोजी । ह्राङला आङाला ह्रोरी याम्बुरी दोखासी गेला बन्दोवस्था लासी कोलाकादेनो याम्बुरी बाजी । नाम्सारीन देनोन याम्वुरीनोन कमलादा दुःख ताजी । ओत्ते तार्साई ह्राङसे सेबा बाङसे खाम्बा बेनान ह्राङबा गे लासी कोला ब्लिला फो ल्पिङना लाजी कमलासे । गोल्छेन म्हि, गेन्दुन सेबान निजी । थेलान ताङरी दिङगी विमा ल्हाना अनाथ असाहाय बाल सुधार समाजला चोहो दोसी गेलास्युजी कमलासे । थेरीन गे लाबा अनुभवलान आधाररी कमलासे भीमगोले, पंच तामाङ, कृष्ण तामाङला सल्लाहरी म्हेन्दो ङसि मुल्मिकादेला कार्यसमिति मुबा श्री मुुक्ति बालकल्यान केन्द्र स्थापना लाजी कमलासे । गोदिमला गेला लागिरी दात्ते कृष्ण तामाङसे ह्रो लाबामुला कमलादा । कमलाला गेल्दुनरी दात्ते तामाङकादेला अनाथ असाहाय १४ जना कोलाकादे मुला । थेनोन कोलाकादेला स्ह्यारला लागिरी कमला स्योला ४ः०० ङ्हयामा रेसी म्हुनाला ११/१२ः०० ङ्हयामा जे म्हर्ेवारी म्याङबा मुला । थे गेरी कमलादा धादिङला कुमारी तामाङसे ह्रो लाबामुला । श्री मुक्ति बाल कल्यान केन्द्रला कोलाकादे कमलासे नयाँबजार ला मनासलु बोर्डिङरी डोबान लाबा मुला । कमलादा दात्तेदोना गोर ङ्िह सोम व्यक्तिला वाहेक खाजिवाई ग्लाग्याम ह्रो याङबा आरे । ह्राङसे खाह्राङले चुह्राङबा गेन्दुन ठ्वाङबा सेम ताजी विमा, ङाला कोला थेन ङाइ ह्राङबा खालाइसे दुःख आयाङ्गै ङाइ खालाइदा या ङ्िह थुइसी ज्याबा ताला बिसाम तिल्दा कुटिसी टिसे विसी चुह्राङबा गेन्दुन ठ्वाङबा हिन्ना बिसी कमलासे सुङजी । दात्ते कमलासे गोर ब्ली कोठाला लाला छ्यो आछ्यो तोङ च्युइ फतोवा मुला । दुःख लान तामरी ः ह्राङला गेेन्दुनला कोषरी कादे टाङ्गा पोप ताजी बिमा टंगा पोप लाबारी खाम्बा आरे दात्तेदोना टाङगा गिनोन आरे विसी सुङजी ।

चुत्तेबा संघर्षला बाबजुदनोन कमला नमुुना महिला लोप्खाङरी दात्ते कक्षा सोमरी डोबान मुला । कोलाकादेला स्याहयार, चाबारी गे लाबा, ह्रो लाबा ग्ला माइमा कमलाला लोप्खाङरी ला सोमला हाजिरी जम्मा १६ रे ताबा मुला । तार्साई कमलाला डोबा ख्याप्पा विसम ज्याबा मुला । खाम्देदोना दोखाङरी थेनोन अनाथ कोलाकादेदा ग्याम ओन्बान ह्राङनोन एस.एल.सी दोना डोबा पुरा लाबा सेम मुला विसीनोन कामलासे सुङजी ।