प्रकाश ब्लोन चलचित्र छायांकनला तयारीरी

आदिवासी चलचित्र महोत्सव क्योलोलो चेक्खेन याम्बुरी थुम्जी । होजा महोत्सवरी तामाङ ग्योइरी स्होवा चलचित्र मोलम तामाङ चलचित्रला प्रतिनिधित्व लाबान प्रदर्शन ताबा मुबा । दात्ते तामाङ ग्योइला चलचित्रला संख्या च्यामा बोगाल गी वाइसी जिन्बा मुला । बोगाल गी बिमा ल्हाना चलचित्ररी चुपाल्सेला अन्तराष्ट्रिय आदीवासी चलचित्र महोत्सवरी बिसाम मोलम चलचित्रसेन प्रदर्शन ताबा अवसर याङजी । महोत्सवरी प्रदर्शन लाबा चलचित्र मोलमला ताम लातोमा चु चलचित्र पञ्चबुद्ध फिल्मसला प्रस्तुतिरी २०६२ सालरी स्होवा मुबा । निर्माता मीम लामा ओम निर्देशक राम जनकसे लाबा चु चलचित्रला कथा, पटकथा, संवाद ब्रिबा मुबा प्रकास ब्लोनसे । प्रकाश ब्लोनसे चु बिमा ङहाच्छा तामाङ ग्योइलान चलचित्र म्हेन्दोला मायारीनोन ह्वाई ब्रिबा छ्यामरी सह-निर्देशननोन लाबा मुबा । मोलम चलचित्ररीनोन सह-निर्देशन समेत लासि जिन्बा प्रकास ब्लोनथेन लाबा ल्हेङमो ताम्सालिङला चु बोरीः-

चलचित्रला कथा, पटकथा ब्रिबा बिमा ङ्हाच्छा ह्वाई ब्रिबा लामुबा ह्वाई ब्रिबारीचा खाराङ लासि चुजि -

खप्पाई बिमा ङ्हाच्छामी ङा जाजाबा ह्यान्देन सेमलेङप्रति झुकाब थान्बा लाबा मुबा । जब ङा याम्बुरी वाङजी थेलिच्छा सेमलेङप्रति झुकाब थान्बासे ङा याम्बुरी ताबा ल्हानान तामाङ साहित्यिक गेताङकादेरी निबारी वाङजी । गेताङकादेरी निबालान ताङरी तिरेकुनु काई स्हेङखेन कुबेर सिं दोङदा स्याप्पा अवसर याङजी । ङादा ह्वाई ब्रिबारी अनुरोध लाजी कुबेर सिंसे थेराङ लासिन चुबा हिन्ना ।

दात्तेदोनाला ब्रिबाला यात्रारी कादे तामाङ ह्वाई ब्रिस्युजी -

ङाइ खाप्पाइ बिमा ङ्हाच्छा ब्रिबा ह्वाइ ङ्हीरेला केवा बिबा एल्वमरी कुन्ती मोक्तानसे कोबा तिनी आइ ङा ... बिबा बोलला ह्वाई हिन्ना । थे लिच्छा दात्तेदोना दोखामा बोगाल ङ्हीला हाराहारिरी दोजी ।

ह्राङमी ह्वाइ ब्रिखेन म्ही चलचित्रला कथा ब्रिबारी खाराङ लासि दोजी ओम -

फिरी बिबा ह्राङवान गेताङकादेरी ब्राबालान ताङरि तिरेकुनु निर्देशक सञ्जय बलसे ङादा चलचित्रला कथा ब्रिबारी अनुरोध लाजि । थे लिच्छा र्ङाई म्हेन्दोला माया बिबा तामाङ ग्योइला चलचित्रला कथा ब्रिबा मुबा चुह्राङलेन म्हेन्दोला माया चलचित्रग्याम चलचित्रला कथा ब्रिबारी शुरु लाबा हिन्ना ।

ह्राङसे कथा, पटकथा ब्रिबाला छ्यामरी सह-निर्देशन लाबा चलचित्र मोलम अन्तराष्ट्रिय आदिवासी चलचित्र महोत्सव २०६४ री प्रदर्शन ताबारी सफल ताबा मुबा ह्राङदा खराङबा छोर्मु -

जब तामाङ ग्योइला चलचित्र मोलम चु महोत्सव बिमा ङ्हाच्छा तिलाई दिङ ङहाच्छा प्रदर्शन ताबा मुबा । थे दुइरी दर्शककादेला सेम डासी माया याङबारी खाम्मा औदिन ताङबा मुबा । थेह्राङलेन जब चुपाल्सेला अन्तराष्ट्रिय आदीवासी चलचित्र महोत्सव २०६४ री चु चलचित्रसे तामाङ चलचित्रला प्रतिनिधित्व लाबान प्रदर्शन लाबा अवसर याङबा मुबा । थेरि ङादा खराङबा छोर्जी बिसाम ङाइ कथा ब्रिबा ताङरि अझनोन निखार बातोनाम, चु बिमा अझ मिहिनेतला छ्यामरी परिश्रम लातोनाम अझ गहिराइरी निदासी कथा ब्रिबारी बाँकीन चिम बिबा खालला अनुभव ह्रुप्पा अवसर याङजी ।

ह्राङसे चु महोत्सवरी कादे चलचित्र च्यास्हयुजी -

गोर डु जेख्खेन चलचित्र च्याबा अवसर याङ्जी ।

ह्राङदा सेम निबा चा खचिबा ओम -

गुरुङ ग्योइरी मुबा कृपाला छ्यामरी थारु ग्योइला बुह्रान चलचित्र हिन्ना ।

तिला मुबाचिम थेरिजा ह्राङदा सेम निवा -

गुरुङ ग्योइला चलचित्र कृपारी गोरगी निर्दोष व्यक्तिदा दोषी स्होवा नाम्दार थोरी केन्द्रीत ताबा मुबा बिसाम आर्कु चलचित्र थारु ग्योइला बुह्रानरीचा नाम्सारी फ्युक्पोसे प्राङबोदा खराङ लादासि बसाइ- सराइ तावारी बाध्य ताना लाबा मुला । ओम थेनोन कथावस्तुरी मुबा चलचित्र ङादा सेम निजी ।

दत्ते तामाङ चलचित्रकादेला संख्या च्यामा बोगाल गि विमा थोरी दोसी जिन्वा अवस्था मुला बोगाल गि बिमा ल्हाना तामाङ चलचित्रकादेरी महोत्सवरी मोलमनोन चा छनौट ताजिम तिला मुबा खास लासी मोलम न्हाङरी -

चलचित्र मोलमरी गोरगी म्रीङकोलादा लाबा बोक्सी आरोप जुन आरोप अशिक्षाला कारणसे लाबा मुला थे तासि परिवर्तनला आधार बिबा जा शिक्षा हिन्ना बिबा तामदा हुन्वा मुबा । थेलिच्छा चलचित्रला फुम्बा साँजी बिवा गोरगी पात्रसेजा खोरे नाङ जीला लागिरी जी आइराकला स्वार्थरी तोवा आतोवा ताम ल्हागव लाबा थे ह्राङबान कथाबस्तु मुबा छ्यामरी ह्याङला धर्म रिमठिमला तामकादे मुवा ।

ह्राङदा महोत्सवसे जा आदिवासी चलचित्रकादेला निर्माणरी खाराङबा भूमिका क्लाङला ह्राङ छोर्बा मुला -

वास्तवरी चुह्राङबा महोत्सव तासिन चितोला । चुह्राङबा महोत्वसवला आवश्यकता मुला । चु ह्राङबा महोत्सवसे नेपालला चेक्खेन आताना अन्तराष्ट्रिय स्तररीनोन आदिवासीकादेला ह्राङला आमाग्योइला चलचित्र गुणस्तरिय स्होबारी ग्रेन भूमिका क्लाङला बिबा म्हान्बा मुला ।

दात्ते तामाङ चलचित्रकादेला अवस्था च्यामा तिलोओन तामाङ चलचित्र ल्हानान ल्हेसि निबा मुला बिसाम अर्कु होना तामाङ चलचित्र गुणस्तरिया आखाबा बिबा गुनासो मुलानी चुह्राङबा प्रतिक्रियादा ह्राङसे खाह्राङ लासी च्यास्युबा मुला -र्

दर्शककादेला गुनासोदा र्ङाई सकारात्मक रुपरि किन्वा मुला । जहाँदोना तामाङकादेला ल्हानान चलचित्रकादे खाबा मुला थे आन्छारला गुणस्तरियता आखाबा महशुस ङाइएनोन लाबा हिन्ना । ङादा तिक छोर्बा मुला बिसाम गोरगी तामाङ चलचित्र च्यामा ह्याङ फिल्महलरि चलचित्र च्याबा आहिन, तामाङ नाम्सा न्हाङरि मुला । तामाङ रिमठिम न्हाङरि मुला बिबा आभास पिन्वरि खाम्तोला ।

ह्राङसे तिनीन्हाङर चलचित्रला कथा ब्रिबाजा ख्लाबा की तिला -

र्ङाई तामाङ चलचित्रला कथा ब्रिबा ख्लाबा आहिन । जजाकी ज्याबा स्होबारी म्हाइमा गाइबा चेक्खेन हिन्ना । दात्ते ङाथेन गोर सोम ह्राङबा चलचित्रला कथा मुला । दारेम योनान कथाकादेदा चलचित्ररी छायांकन लाबा योजनारी मुला ।

तामाङ चलचित्र निर्माताकादेसे जा तामाङ चलचित्रला दर्शक च्याङना मुबासे लामा ल्होल्हो समस्या न्हातोबा बाध्यता मुलारोम -

बास्तवरि ज्याबा गुणस्तरिय चलचित्र स्होजि बिसाम तामाङ चलचित्र च्याबा दर्शककादेला उपस्थिति ल्हाना मुला । तामाङ चलचित्रला दर्शकनोन आरे बिबारी जा आता । उदाहरणला लागिरी तामाङ चलचित्र मोलमदा किन्बारी खाम्ला चु चलचित्रसे ल्हानान दर्शककादेला माया याङबा मुबा ।

- खड्ग मोक्तान