कवि गोष्ठी फिरी तुन्बा समिक्षा

रन्जिता लामाला केवा चु बिमा २० दिङ ङ्हाच्छा काभ्रेपलाञ्चोक जिल्लाला मादनकुडारी गाविस वडा नं ३ री ताबा हिन्ना । आपा माणिक लामा तेन आमा ल्हामो वाइबाला च्याङबा जामे रन्जिता मोडलिङला थुमरी चु बिमा दिङ ङ्िह ङ्हाच्छा चेक्खेन वाङबा हिन्ना ।

तिल्दा वाङबा ओम मोडलिङरी - बिबाला प्रश्नला जवाफरी रन्जितासे पाङजि मोडलिङला थुमरी ओतेबा नानाआङा आरेबा ओम ह्राङला प्रतिभा उन्बा ग्ला ताला म्हान्तासि चु थुमरी वाङबा हिन्ना । छ्यामरी ङादा ज्याबा छोर्बा ओम तामाङला पहिचान तेन रिमठीम उन्बादा लागिरी नोन चु थुमरी वाङबा हिन्ना ।

रन्जितासे चुनोन तामला छ्यामरी आर्कुइ तामए काब्जि खाला तामान म्हि स्यानला ङोन्छाङ ङोसेबा सेम ताबा ह्राङबान ङादाइ थु थुमग्याम ह्राङला मीन स्यानला ङोन्छाङ बाबा सेम थोसिनोन चु थुमरी वाङबा हिन्ना । प्रचार प्रसारला हिसावसे योना ङोसेबा थुम हिन्ना ,

दात्ते बि.ए. गिछा दिङरी डोबान मुबा रन्जिताला दिम म्हेम्हेला पृष्ठभूमि बिसाम राजनीतिक पृष्ठभूमि हिन्ना तासाइ रन्जितासे बिसाम राजनीति बिमा ल्होल्हो थुम चुङबा मुला । आपा माणिक लामाला राजनीतिरी ह्रेङबा योगदान मुला बिसाम नाना नविना बानेश्वर क्याम्पसला स्ववियुला चोहो । दिम म्हेम्हेला वातावरण चुराङबा मुसाइ रन्जितासे मोडलिङ थुम चुङबा मुला । राजनीतिक वातावरण न्हाङग्याम थोन्तासि स्याननोन थुमरी वाङमा दिम म्हेमेसे आफ्ठ्यारोम आलाजि ह्राङला सेमनिबा थुमरी वाङबारी बिसि ङ्योइमा रन्जितासे पाङजि-ङाला आपा नाना राजनीतिक थुमरी वाङबा तासाइ थेनिला बिचाररी ओराङबा आरे । हिन्ना आपासे शुरुरी चु थुमरी वाङमा आपासे आकेबाम आहिन तासाइ ङाइ सेम लाबा ग्लारी काबारी आखाम्जि । राजनीति लाबा म्हिला जामेसे राजनीतिन लातोला बिबा आरे । ह्राङदा जुन थुमरी गे लाबारी सेम निला थेरी लाबारी म्याङतोला बिबा ङाला मान्यता हिन्ना ।

थे हिन्साम राजनीतिक थुमरी वाङबा सेमचा आरे बिबा प्रश्न ङ्योइबाला जवाफरी- हिन्बाम राजनीतिक चेतना बेनातान तोला । तासाइ राजनीतिन लाबा, नेत्तान दोबा सेम आरे तासाइ दिमला वातावतरण राजनीतिक ताबासे लामा चुला फिरी सेम आनिबा बिबाचा पक्कान आता ।

हिन्बाम रन्जितासे मोडलिङला थुमरी वाङबा ओते ल्हाना ताबा आरे । मिस तामाङ सन् २००६ याम्बुरी खाप्पाइ बिमा ङ्हाच्छा ताबाला ताङरी रन्जितासेनोन थेरी बो किन्बा मुबा । मिस तामाङरि टप फाइभ दोना दोबारी सफल रन्जितासे मिस तामाङग्याम्सेन मोडलिङला थुमरी वाङबा हिन्ना । रन्जितासे मिस जनजाति सन् २००६ रीनोन बो किन्मा बेष्ट वाकला पुरस्कार डाबारी सफल ताबा मुबा बिसाम दर्जन गिबिमा ल्हाना फेशन सोकादेरी समेत बो किन्सि जिन्बा मुला ।

ओतेचे आताना रन्जितासे विभिन्न हृवाइकादेरीनोन अभिनय लाबा मुला बिसाम छार तामाङ चलचित्ररी समेत क्लाङबा तयाररी वाङबा मुला ।

हिन्बाम मोडलिङ थुमदा हृयाङला समाजरी ओतेबा ज्याबा मिसे च्याबा लाबा आरे । तामाङरिम झन ल्हाना ह्राङबा म्हिसेम चु थुमला फिरि थाहानोनए आरे । ओराङबा थुमदा रन्जितासे बिसाम ह्राङला दुइ पिन्सि टिबा मुला । चुला फिरि रन्जिताला प्रतिकृया बिसाम चुराङबा मुला -खाप्पातामान थुमरी ज्याबा आज्याबा बिबा तानोन ताला । म्हिसे तिला तामान बिसाइ चु थुम ओतेबा आज्याबा आरे । बेनान स्हेदा आज्याबा किसिमसे आच्याबारी बेनानदान अनुरोधएनोन लाला ।

हिन्बाम रन्जितासे चु थुमदान ह्राङला पेशान स्होबा लक्ष्य बिसाम थोबा आरे । ह्राङला आपा नाना तेन स्यान समेत सामाजिक गेरी वाङबासे भविष्यरी ह्राङएनोन सामाजिक कार्यकर्ताला रुपरी गे लाबा सेम थोबा मुला ।

खाबा रेरी जनजातिला आपा आमा आरेबा जात्तुकुकादे तेन नानाआङाला पक्षरी गे लाबा सेम थोबा मुला । थेला लागिरी रन्जितासे गोर्कि छार संस्था समेत ठ्वाङबा मुला ।

दात्ते रेडियो एचबिसि री जनजाति गेताङ समेत संचालन लासि खाबा रन्जितासे सामाजिक गेला छ्यामरी संचार माध्यमरी गे लाबा सेम समेत थोबा मुला ।