दीङः २ बोः ७ पूर्णाङ्कः २७, २०६४ जेठ १ ह्यान्दे १५, मइ १५ - मइ २९, २००७ Tamsaling fortnightly Online News.
Tamsaling Archieve
April 14 to
28, 2007
April 29 to May 14
May 15
to May 29
समिक्षा, डाजाङ थेन हृवाइखा
दोक्सेबिमा ङ्हाच्छा मी हृवाइखा थेन तामाङ डाजाङला समिक्षा ब्रिखेनला ब्रिगूदा डाजाङला तर्फयाम तिङन्हाङ्सेन आभारीला छिग थेन थुजेछे । जेनतेन काक्टाककुक्टिक ब्रिबान् छिग सोम ब्लीला ग्योइकाई यात्रारी गोङमा चुबा तामाङ ह्युल्बाला सेमलेङ खेन्पोकादेरी समिक्षकनोन मुबाटिम । तामाङ डाजाङला समिक्षा ब्रिखेनसे ह्राङनीला सम्मानित स्योस्यो ताम्सालिङरी निबा अंकरी लास्युबा समिक्षारी तामाङ डाजाङसे तिगै काप्तोबा ह्राङ म्राङजी ।
तामाङ डाजाङसे लाबा ग्योइकाइ गोताङलान् निरन्तरता थे हृवाइखा प्रतियोगितारी हृवाइखा ब्रिबा स्रष्टाकादेसे बो किन्बा मुबा । तामाङ ग्योइकाइला थुमरी गे लाबा तामाङ डाजाङ गैह्रनाफामुखी गोर गीक सामाजिक गेन्दुन हिन्ना । स्थापानकाल हेन्सेन् स्वार्थला लागि खाजुबै गेन्दुनला मेदोसी आब्राबा चु गेन्दुनसे लाबा सकारात्मक गेकादेदा तामाङ ह्युल्बासे तिनी दोना थुजेछे पिन्बान मुला । थेनोन आमुल परिवर्तनकारी भूमिका म्राङसी यारी या बामरी बाम लाबारी बिसी डा.गणेश योन्जनसे लाख गीकला अक्षयकोषला घोषणा लास्युजी थे घोषणादा सकारात्मक थेन समाजसेवी गे बिबान स्यान्दो तामाङ मुल्मी कादेसेनोन ह्राङला तर्फग्याम्से बो किन्बा बिसी तामाङ डाजाङदा तामलासी जिन्बा मुला । तामाङ डाजाङ थेन रेडियो सगरमाथा डिक्सी स्हेङबा 'तामाङ काइ' रेडियो गेताङ निरन्तर तामाङ ह्युल्बा थेन सशक्तिकरणला लागि बोल्सी टिबा मुला । 'कुनिरी चिसी दुनिरी चाबा' तमाम सचेत तर प्रगतिशिल श्रष्टाला सम्मान लाबा ताङरी श्रष्टाकादेला छ्योइकादे तेबारी प्राविधिक थेन आर्थिक ह्रो लासी खाबा डाजाङसे ग्योइकाइला थुमरी उदाहरणीय गे लाबारी ङ्हाच्छा निबान मुला । हिन्ना, थेला लेप्ालेप उदाहरण अस्मिता थिङ 'म्हेन्दो' ला 'दुङालला ल्हुइ' ला विमोचन ।
समालोचकसे लाबा तुन्बा अध्ययनला परिणाम ह्रेङबा समिक्षा सतही थेन खण्डनयोग्य मुला बिबा ठहर तामाङ डाजाङला मुला । 'ग्योइकाइ दुइला ऐना हिन्ना' बिसी ब्रिबा समिक्षकसे थे प्रतियोगिता गेताङरी डोबा हृवाइखादा तिक्दा जनआन्दोलनला फोटोकपी बिबा हिन्ना ? फोटोकपीला अर्थ तिगा ? ग्योइकाई समय सापेक्ष ताला बिबा चा तिक्दा आगोबा ओम ? समिक्षा मिथ्या आरोप थेन सतही अध्ययनला कारण समिक्षकला लेखकीय धर्म मापन ताबामुला बिबा ठहर डाजाङला मुला । सम्मानित थेन गम्भिर विषयरी ब्रिबा लेखसे सम्मानित स्योस्योला होर्डिङ बोर्डरी ग्रेन असर तामुला । थे ताबासे समालोचक दोबारी हतार तिक्दा ? याफ्लासे दिनीदा गाप्पारी आखाम बरु सकारात्मक सोच थान्सी सुधार लातोबा स्हेदा ओन्बारी म्हाइसाम कादे ज्याबा तासेला । थे प्रतियोगिता जेक्केन च्यासी सिंगो तामाङ डाजाङला आर्थिक थेन सामाजिक हैसियतला उजागर लाबारी म्हाइमा समालोचना आलोचना जेकेन ताजी । ब्रिखेनसे थेपट्टी तिक्दा मी च्युप्बा ?
'चाबा न थुङबा ग्राम्बारी पुङ्बा' बिमाह्राङ थेह्राङलासी लाबा समिक्षासे न समिक्षकला छिगला सम्मान ताला न 'फुम्बा थिसी बाङ्बा पोङ चुङसी डिक्पा बोक्टो ठिम' थोबा तामाङला ताला ? ह्राङ ह्यूल थेन म्हीह्युल दोनाला ग्योइकाइखेन्पोला ताम लाबान् वास्तविक दोङरापला टा म्हाइबा थे लेखरी ब्रिखेनसे 'दिनीरिन लाल्टिन म्रासी बास्तविक श्रष्टा' म्हाइमा ह्राङलान बास्तविक ङोसेबा चा तिग ओम ? खालैसे पाङआतो प्रष्ट ओन्सी जिन्जी । ह्राङला अस्तित्व ह्राङसेन ।
ओन्छ्यान बितोबा शैली ब्रिबा थे लेखदा प्रतिकृयाला लागि सस्तो प्रतिकृया पिन्सी चर्चारी खाबा सेम तामाङ डाजाङला आरेबासे चु पतिकृया पिन्बा हिन्ना । तिक्दा बिसाम कपोलकल्पित, यथार्थ विपरित थेन मनगढन्ते तामसे सच्चा, प्रगतिशिल, डाजाङला ङेबा ङेङगोर 'तामाङ काइ' ङ्यान्खेन, श्रष्टा खालैदा अर्को साङ्युर आनिगै । चाङमा सेम तामाङ डाजाङला थेनोन हिन्ना । निबा दुइरी ह्राङलासी ह्राङनीला सल्लाह, सुझाब, प्रतिकृया थेन सहयोगला आशा लाबा गेन्दुन, तामाङ डाजाङ नागीसे पुइरी ख्राप्ची बिसी नागीला पुइ ख्राप्पा गेन्दुन आहिन् । कावासे न्हाबेङ बोर्जी विमा थेला लिच्छा यार्बा मर्ुख गेन्दुननोन आहिन् । थे ताबासे डाजाङला सकारात्क पक्षदा नोन च्यासी, गोसी नुप्पा समिक्षा लाखाम्सामी तामाङ डाजाङसे हृवाइखा ब्रिखेनहेन्से समिक्षक दोना तामाङ श्रष्टा स्याप्सेला मुबा । थे ह्राङनोन हिन्ना वा तिग् थाहा -
- तामाङ डाजाङ
ताम्सालिङ अनलाइन डट कम
ला लागीरी तेबा ग्रेन डिक्खेन जगतमान लामा, डिक्खेन कुमार मोक्तान, ह्रो डिक्खेन
श्रृजना गोले, प्रतिनिधि खड्ग मोक्तान, बजार विश्वोर दोङ, ह्रोलाबा चन्द्र दोङ,
सल्लाहकार डा. गणेश योञ्जन, अमृत योञ्जन, कानुनी सल्लाहकार अधिवक्ता कुन्साङ
योञ्जन, प्रबन्धक अम्बर बम्जन तामाङ ।
प्रायोजक थेन वेभ मास्टर मुकेश लामा,
याम्बु, नेपाल ।