Premier web site dedicated to Tamangs all over the world

दीङः २ बोः ६ पूर्णाङ्कः२५, २०६४ बैशाख १६ ह्यान्दे ३१, अप्रिल २९ - मइ १४, २००७ Tamsaling fortnightly Online News.

डिकि लामा, वरिष्ठ ह्रोचोहो, नेपाल तामाङ घेदुङ

ताम्सालिङ न्हाङरी चेतना बोर्बा अभियान मुला

निबा च्युइसे डु दिङ ह्यान्छे शैक्षिक थुमरी संलग्न तासी शिक्षाला नाङसाल म्राबान ङ्हान्छा दोखाबाला छ्यामरी २०५९ साल ह्यान्छे नेपाल तामाङ घेदुङरी आवद्ध तासी गोलाबान ङ्हाच्छा ज्योन्खाबा डिकि लामा नेपाल तामाङ घेदुङला वरिष्ठ केन्द्रिय ह्रोचोरी डाबा मुला । तिनिला नानाआङा स्तम्भरी डिकि लामा तेन लाबा ल्हेङमो चु बोरी थान्बा मुला ।

तिनी न्हाङगार ह्राङ काते व्यस्त मुला -

खाजिवाइ म्हि ओस्नो टिबा बिमा व्यस्त ताबान ज्याबा ताला । घेदुङसे स्हेङबा छ्यामरी स्यान-स्यान संस्थाकादेसे स्हेङबा गेताङरी क्यार ब्रातोबा मुला । ओत्ते जे आताना ह्राङला लोप्खाङरी ङाइनोन बेनान ह्राङबा गे च्यातोवा मुला व्यस्त ह्राङबान बितोजी ।

नेपाल तामाङ घेदुङला डुछा जोम्नासे ह्राङदा वरिष्ठ ह्रोचोहोला दानरी दाम्बा मुला, ह्राङदा खाराङपा छोर्बा मुला -

ङा ताङबा मुला । चु अर्थरी घेदुङला केन्द्रिय स्तररी नानाआङाला प्रतिनिधित्व ङ्हाच्छा- ङ्हाच्छा ओत्ते आम्राङबा मुबा । दात्ते ङादा चु वरिष्ठ ह्रोचोहोला दान घेदुङसे दोन्बा बिबा नानाआङादानोन नेतृत्व चयनरी थान्बा हिन्ना । नानाआङाला प्रतिनिधित्व लाबान नेतृत्व चयनरी दोबा बिबा खाली ङाला लागिरी जे आताना क्योङनोन नानाआङाला लागिरी ताङबाला ताम हिन्ना ।

तिला ह्राङदा घेदुङला चु जोम्नारी ङाइ वरिष्ठ ह्रोचोहोलान जा दान डाबारी खाम्ला, याङबारी खाम्ला बिबा तामरी विश्वास मुबा ?

विश्वास मुबा । दात्तेदोना केन्द्रिय स्तररी थेएनोन ग्रेन दानरी नानाआङा दोबारी खाम्बा आरेबा । ङाइएनोन घेदुङला विषयरी तिलाई अनुभव मुवासे उम्मेद्वारीला रुपरी रेतोबा ह्यान्छे स्यान दानरी तिला रेसे विसी ह्रोचोहोलान दानरी निवेदन प्रस्ताव पेश लाबा मुबा । लिच्छा स्यान स्यान ह्रोकादेसे थे प्रस्ताव सहमतिरी खाजी ।

ह्राङसे सुङजी कि दात्ते दोना केन्द्रिय स्तररी थेएनोन ग्रेन दानरी दोबा आरेवा । नानाआङासेन दोबारी बाङ आलाबा हिन्ना ?

थे ताम तिला बिसाम ह्याङला समाजरी नानाआङादा च्याबा दुष्टिकोण ओत्ते फराकिलो ताबारी खाम्बा आरे । थेसे लामा नाना आङा बेनान थुमरी लिच्छा मुला । तामाङ नानाआङारी राजनैतिक, सामाजिक चेतना खाबा वातावरणनोन ङ्हाच्छा-ङ्हाच्छा आतानी । तिलाई दुइ ह्यान्छे नानाआङानोन सक्रिय ताबा म्राङबा मुृला । तासाइ घेदुङसे नानाआङादा नेतृत्व चयन लाबा ग्ला पिन्बा आरेबा मुबा । नानाआङासे ह्राङ -ह्राङला ग्लाग्याम बाङ आलाबा आहिन । हिन्बामी खालाइदा ग्रेन ग्ला पिन्सीमान जे आता । थे दानरी टिसी गे लाबारी खाम्तोजी । गे लाबारी खाम्बा वातावरण तोजी । थेसे लामा ज्योज्योआलेसे ह्राङनोन नानाआङासेनोन खाजिवाई थुमरी नेतृत्व लाबारी खाम्ला ।

दात्तेजा घेदुङसे समाबेशी प्रतिशतला आधाररी नानाआङादा ग्ला पिन्वा हिन्ना ?

हृयाङला समाजरी नानाआङाला राजनैतिक, सामाजिक थुमरी ओत्ते ज्याबा योगदान ताबारी खाम्बा आरे । घेदुङसे नानाआङादा ग्ला पिन्बा छोर्वा विमाइनोन ग्ला पिन्बारी म्हाइबा ह्राङजा छोर्बा मुला ।

ह्राङ घेदुङरी दोखाबा विमा ङ्हाच्छा तिला लास्युबा मुवा ?

ङा जाजामा हृयान्छेन सामाजिक गेरी सेम थान्बा म्हि हिन्ना । थेसे लामा लोप्खाङ संचालन लाबारी वाङबा मुबा । ओह्राङलेन स्यान स्यान सामाजिक गेरीनोन गे लाबा अनुभवकादे मुला । राष्ट्रिय आदिवासी जनजाति महिला महासंघरीनोन ङाइ गौराइला दानरी टिसी गे लाबा मुला । समग्ररी ङा सामाजिक गेरीन संलग्न मुबा ।

समाजसेवा थेन राजनैतिक थुमरी खाइमा ह्यान्छे वाङस्युबा ?

०४५,०४६ साल ह्यान्छे ङा गोसी आगोसी रमितेला हिसावरीन ल्होलो ल्होलो आन्दोलनरी बो किन्बा, नारा लाबा सडकरी ब्राबा लाबा मुबा । थेलान ताङरी घेदुङला जिल्ला मुल्मी तासी गे लाबारी वाङजी । लिच्छा घेदुङला ङ्िहछा जोम्ना ग्याम घेदुङरी झुकाव ताजी । थेसे लामा निरन्तर रुपरी खाबा हिन्ना ।

दात्ते राजनैतिक थुमरी तामाङ नानाआङाला सक्रियता खाराङपा म्राङस्युबा मुला ?

ह्याङला समाज ङ्हाच्छा विमा गोलेसे फराकिलो ताबान खाबा मुला । थेलान उपलब्धी मान्तोला कि दात्ते राजनैतिक थुमरी नानाआङाला सक्रियाता ल्हेबान निबा मु्ला । ङ्हाच्छा विमा दात्ते शिक्षित नानाआङाला संख्यानोन ल्हेबाना निबा मुला विसाम नानाआङारी सामाजिक राजनैतिक थुमरी ताउ अथवा स्यान खाजिवाइ ग्लारी नानाआङाला पहुँच ल्हेवान निबा मुला । घेदुङलान जोम्नाला ताम लातोमा ङ्हाच्छा खाजिवाइ नानाआङा, खाजिवाइ दानरी टिवारी लोङबा ङ्ि्ह सोम मुसाइनोन ङा आटी ए टिउ बिबा लाबा उदाहरणकादे मुला विसाम दात्ते मी गिसेम गी ङाइ खाजिवाइ दानरी टिसी गे लाबारी खाम्ला बिबा विश्वास तेन प्रतिवद्धता थोसी प्रतिस्पर्धारी खाबा मुला । चु ज्याबा पक्ष हिन्ना ।

नानाआङाला नातासे तामाङ नानाआङाला विषयरी ह्राङला खाराङपा अभियान मुला ?

ङाइ खाम्देदोना तामाङ नानाआङाला समस्यादा गोबारी बाङ लातोला । घेदुङसे दारेम ताम्सालिङला विषयरी आन्दोलन थेन खाका तयार लाबान मुला । थे लिच्छा घेदुङग्यामसे ताम्सालिङ न्हाङरी ल्होलो-ल्होलो खालला चेतना बोर्बा गेताङ स्हेङबान मुला । थेला लागिरी ङादानोन जिम्मेवारी पिन्बा मुला । थेलान ताङरी ताम्सालिङ न्हाङला नानाआङादा खाह्राङले राजनैतिक थेन सामाजिक चेतना पिन्वारी खाम्ला बिबा तामरी ङाइ खाम्देदोना प्रशिक्षणकादे बोर्बा तयारी स्होबा मुला । विशेष लासी डोसी ख्यात्सी शहररी दोखाबा नानाआङादा विमाइनोन नाम्सा नाम्साला नानाआङादा विशेष प्राथमिकता पिन्तोबा सेम मुला ।

दात्ते ह्युलरी म्रिङकोलाला विषयरी आरक्षण थेन प्रतिशतला ताम ल्हाना चर्चा ताबाला फिरि ह्राङला तिला धारणा मुला ।

गाङसल हिस्सा ओगटप लाबा नानाआङादा राज्यसे जम्मा ३३ प्रतिशतजे पिन्बा मुला । आरक्षणला छ्यामरी नानाआङादा ५१ प्रतिशतनोन तोला - चु आरक्षण छिगनोन तेबारी आता । तेनोन तोसाइ आरक्षण खाह्राङबा म्हि, खाह्राङबा ग्लारी पिन्तोला थे पहिचान लाबारी खाम्तोला । म्रिङकोलाला लागिरी आरक्षण बिबा दयाला रुप हिन्ना । नानाआङानोन ह्राङलान पौरखरी सोबारी खाम्ला । थे तासी आरक्षण आताना नानाआङादा खाजिबाइ थुमरी स्वतन्त्र रुपरी गे लाबारी ह्याङला हृयुलसासे ज्याबा स्वतन्त्र वातावरण पिन्तोला ।

घेदुङला आन्दोलन मान्बा ह्राङबा आतानी, ज्याबा आतानी घेदुङसे क्योङनोन तामाङदा पोप लाबारी आखाम्नी बिबा खाल्ला आरोपनोन मुलानी ?

खाजिबाइ म्हिसे ग्यापरी टिसी ताम थाबा विमाइनो ङ्हाच्छा खातोला । तामाङसे ह्युल्ला परिस्थिति आन्सार ताम्सालिङला ताम गोबारी डान्तोला विसाम तामा ङसे घेदुङला पहलरी सहभागी तासी ह्राङला अधिकार ताम्सालिङ माइबारी खाजिवाइ तामाङ ङ्हाच्छा ब्राबारी खाम्तोला ।

ताम्सालिङ थेन संविधानसभाला विषयरी तिला सुङला ?

संविधानसभाला चुनावसे ह्युल्री गणतान्त्रिक संविधान शासन स्थापना लाबारी खाम्तोला । लिच्छा जे ताम्सालिङ याङबारी ख म्ला । आहिन विसाम असंभव ताला ।

प्रसंग पोगे, सामाजिक थुम बिमा ह्राङला स्यान तिला थुमरी रुची मुला ?

ह्वाइखा ब्रिबा ङाला रुची हिन्ना । जाजामा लोप्खाङरी डोबा दुइरी स्याबा कोबारी ङाइ बोकिन्बा लाबा मुबा । छ्यामरी ज्याबा ज्याबा छ्योइकादे ह्रुप्सी डोबानोन ङाला रुचीला विषय हिन्ना ।

लिच्छारी ताम्सालिङ स्योस्योला फेरी तिला सुङला ?

चुला मिनोन ताम्सालिङ मुला । सायदनोन डिक्नाले स्योस्योला मिन थान्स्युजीम । समग्ररी चुसे ज्याबा चेतनाला लहर ठाम्बा मुला । सेबा आसेबा तामाङकादेसे ङ्योइबा मुला कि ताम्सालिङ बिबा तिला विसी । तामाङ ह्युल्बाला गुङरी दात्तेला अवस्थारी ताम्सालिङ बिबा तिला बिबा प्रश्ननोन खाप्पाइ विमा ग्रेन चेतनाला विषय हिन्ना । थे तासि स्योस्योसे ताम्सालिङ स्हेङबा अभियानरी ग्रेन भूमिका क्लाङला बिबा म्हान्बा मुला ।

ताम्सालिङ अनलाइन डट कम ला लागीरी तेबा ग्रेन डिक्खेन जगतमान लामा, डिक्खेन कुमार मोक्तान, ह्रो डिक्खेन श्रृजना गोले, प्रतिनिधि खड्ग मोक्तान, बजार विश्वोर दोङ, ह्रोलाबा चन्द्र दोङ, सल्लाहकार डा. गणेश योञ्जन, अमृत योञ्जन, कानुनी सल्लाहकार अधिवक्ता कुन्साङ योञ्जन, प्रबन्धक अम्बर बम्जन तामाङ ।

प्रायोजक थेन वेभ मास्टर मुकेश लामा, याम्बु, नेपाल ।
E-mail: ceo@tamsalingonline.com

तिनी ह्यान्देन चुरोट, खैनि, आइराग, सोल्बा गे ख्लागे

सूचना !
तामाङ डाजाङसे ह्राङला ङहा (५) दिङ छ्योबाला दुइसाङरी सोम्छा व्हाइखा प्रतियोगिता लाबान मुला ग्याइ थेन ग्योइकाइ प्रेमीकादे दा किन्बारी अनुरोध लाबा मुला ।

बोकिन्बारी चुह्राङबा नियम मुलाः

१. व्हाइखा समसामयिक विषयरी व्रितोसेला मुला
२. ह्राङला व्हाइखा २०६४ बैशाख २६ गते दोनारी दर्ता लातोसेला मुला
३. दर्ता शुल्क रू. १०० (ग्याजी गीक) पिन्तोसेला मुला
४. गीक्छा, न्हीच्छा, सोम्छा ताबा कादेदा नगद टांगा, ट्रफि थेन प्रमाण पत्र पिनसेला मुला
५. सान्त्वना म्हेन्दो गीकदा पिन्सेला मुला
६. म्होन्दा प्रशंसा पत्र पिन्सेला मुला

गेताङ
रे – २०६४ बैशाख २९ गतथे काम्रे
दुइ – स्योला १०:३० ङ्यान्छे
ग्ला – नेपाल ल क्याम्पस हल , प्रदर्शनी मार्ग

आयोजक / स्हेङबा
तामाङ डाजाङ
याम्बु

जानकारीला लागिरी
बुद्ध योञ्जन 9841395906
राम कुमार जिम्बा 9841 405289
अर्जुन ग्लान 9841 356816