दुर्सा गाङरी राप्प म्हि

- सुजन लामा गोले

अँह
ङदा फिटिक्कन लोङबा आरे
तिनी न्हाङगार
दुर्साला गुङरी
मुदादुगुला गुङरी
म्हुनाकादे थाबन मुला

आसुखाबा टिम सेम
फ्रुल ताइसै मिख्ली
फ्याबरी या आरेमाह्यान्छे
रहर - प्योबा टिम
रहर - लुङबा टिम
रहरला स्योङरी मे निमा ह्यान्छे
बगर दोबा टिम - सेम
आसुखाबा टिम - सेम
बगरला युङबा दोमा ह्यान्छे
दारेम
दुर्सा गाङरी राप्सी
नाम्सा-नाम्सा च्यासै

क्यार-क्यूर घाइतेदुगु मुला
आदर्शसे सोसी टिबा
च्याबा मुला - म्राङबा मुला
सहिदसे तिङन्हाङरी सुबा म्हाङदुगु
नेपाली ब्योनदुगुला
क्रास्यारी छार्बेन लाबा
क्यारक्यूर ल्हानान म्हिदुगु मुला
लोङसी-लोङसी सोसी टिबा
पाङबा लामुला -थेबामुला
खाई ?
खालाङ याङला- तिङ नङ विश्वास
म्हेर्सेला - छुप गी
म्राङसेला - सोबा म्हाङ
छोर्सेला होइस्हेरथेन छ्याम
रुप ताला - ह्राङला म्हिदुगु
देप्पारी
क्यारथेन्जा-ब्लाप्पादुगु

दुर्सा ल्हुङला इर्से उर्से
सोसी टिबा म्हिसे
सिबारी म्लेमाह्यान्छे
लाबारी ब्रोत म्हाइमा ह्यान्छे
तिला ङेसे - दुङालसे प्लिङबा ज्युमङेबादुगु
तिला थुइसे - टुना लाआखाम्बा साइनोदुगु
सेबा-ङोसेबा सालिङदुगु
सिसि निबान मुला
तिला ब्रिसे-दुङालला ह्वाइदुगु
ताइनागि ह्याङला मिख्ली जे
तिला मिख्लीदुगुसे खाइमाई गान्दी स्याप्सी
मोतिथेनछ्याम् खिल्म्याङजी ?

तिलातामन तार्साई
ताम गिसे भूसि खामुला
आशला खार्बा बुट्टादुगु
थोप्प म्हुना लिच्छा
खासेलाम ह्यालनोन हिन्ना
थेनो स्योला
होइस्हेरला
ज्याबा छेटाङरी
फ्याला ह्याङला मिख्लीदुगु
स्योम्ला ह्याङला स्हुदुगु ।

- काभ्रे, सल्ले भुम्लु-२