कवि गोष्ठी फिरी तुन्बा समिक्षा

योग विज्ञान प्रशिक्षण गेताङ थुम्जी

याम्बु । पतंजलि योगपीठ हरिहर थेन नेपाल बौद्धिक तामाङ विद्यार्थी समाज त्रिवि किर्तिपुरला तत्वाधानरी निबा ११ ह्यान्छे १७ रे दोना सप्ताहाव्यापी योग विज्ञान प्रशिक्षण गेताङ स्हेङबा मुबा । चु विमा ङ्हान्छा चैत लारीनोन सप्ताहव्यापी योग प्रशिक्षण गेताङ स्हेङबा मुबा बिसी नेपाल बौद्धिक तामाङ विद्यार्थी समाजला चोहो अन्जान लामा ब्लोनसे पाङबा मुला । गेताङरी ग्यार्जा ङी बिमा ल्हाना प्रशिक्षार्थी कादेसे बो किन्बा मुबा । याम्बुला फन पार्क, भृकुटी मण्डपरी ताबा होजा गेताङरी प्रा.डा. उमाकान्त रायसे प्रशिक्षण दोन्स्युबा मुबा ।

महासंघला डेन गेताङ याम्बुरी

याम्बु । नेपाल तामाङ राष्ट्रिय महासंघसे ह्राङला डुछा दिङसाङ रेला दुइसाङरी विशेष डेन गेताङ स्हेङजी । गेताङरी छोरङान महिला समाजला चोहो फुपुयाङजी घिसिङ, कान्तिपुर सीबी लामा, ग्योइ खेन्पो अमृत योञ्जन, प्रजातन्त्रीक सेनानी नरेन्द्र लामा, नेपाल बौद्धिक तामाङ विद्यार्थी समाजला चोहो अन्जान लामा ब्लोन, बरिष्ठ काइपा चन्द्रकुमार मोक्तानसे ह्राङ ह्राङला ल्हेङमो थान्स्युबा मुबा । ल्हेङमोलान ताङरी पर्वतारोही शम्भु तामाङसे तामाङला गेन्दुनला खाली आयूजे हे्रङबान निबा गे जा खाइमाई आल्हेबा बिसीनोन गेन्दुन फिरी गुनासो लाबा मुबा । महासंघसे ल्होल्हो ल्होलो च्युइसे ङ्दा थुमरी योगदान पिन्सी खाबा १५ जना व्यक्तित्वकादेदा डेन लाबा मुबा । बौद्ध धर्मला कर्मज्ञान सागर लामा बल, प्रजातान्त्रिक सेनानी नरेन्द्र लामा, पर्वतारोही शम्भु तामाङ, ग्योइ खेन्पो अमृत योञ्जन, ङ्हाच्छा साङग्युर वाचिका रमिता बल, कवयत्रि कुमारी तामाङ, बरिष्ठ कलाकार रोज मोक्तान, बरिष्ठ खेलाडी राम लामा, युवासमाज सम्पर्ूण्ाकुमार लामा, विमान चालक प्रमोद लामा, युवासमाजसेवी इन्द्र लामा, बरिष्ठ युवा समाज सेवी र्सर्ूय बज्र लामा व्यक्तित्वकादेदा नेपाल तामाङ राष्ट्रिय महासंघला चोहो डीबी बोम्जनग्याम डेन लाबा मुला ।

सञ्चार समूहला छलफल

याम्बु । तामाङ सञ्चार समूहसे ल्होलो-ल्होलो गेताङ स्हेङसेला विषयरी निबा २२ रे कुन याम्बुरी गोर्गी छलफल गेताङ स्हेङबा मूला । समूहला चोहो प्रतिक ङेसुरला संयोजकत्वरी कार्य समितला निर्ण्र्ााे तामाङ प्रसारणला रेरी प्रमाणपत्र तहरी डोबा गोर्गी जाकोला, गोर्गी जामेकोलादा तोङ ङ्हाला छात्रबृद्धि पिन्सेला ताबा मुला । छ्यामरी दात्तेला दुइ आन्सार संचार थुमरी तामाङ सञ्चारकर्मीकादेला उत्पादन लाबाला लागिरी ल्होलो-ल्होलो खाल्ला तालिमनोन पिन्सेला ताबा मुला । याम्बुला पुतलीसडकरी मुबा डोनाल्ड क्याफेरी ताबा होजा छलफल गेताङरी समूहला कार्यसमिति न्हाङला संचारकर्मीकादेला उपस्थिति मुबा ।

दुवाँलला च्यारिटी जेठरिन

याम्बु । नमोबुद्ध फिल्मस प्रालिला व्यानररी स्होबा दुवाँल फिल्म योनान दर्शककादेला ङोन्छाङ खाबान मुला । नवाङ लामाला निर्माण ओम शन्तलाल घिसिङला निर्देशनरी स्होबा दवाँल फिल्मदा विनोद स्याङतानसे प्रस्तुत लाबा मुला ।

मुलतः नारीप्रधान ओम सामाजिक नाम्दारला फिल्म दवाँलरी हिरालाल ब्लोन, रोश्नी लामा, राजु दोङ, नवाङ लामा, मिलन स्याङतान, गौरी लामा ह्राङबा कलाकारकादेसे अभिनय लाबा मुला बिसी निर्देशक शन्तलाल घिसिङसे सुङबामुला । फिल्म दुवाँलरी नाम्दार, ह्वाइ शन्तलाल घिसिङला मुला बिसाम विश्व दोङसे संगीत दोन्बा मुला । फिल्म दुवाँल चुनोन लाला १८ रे कुनु बोँदीला मयुर हलरी ङ्हाच्छा च्यारीटी सो उन्बान मुला ।

छोरङान महिला समाजला साधारणसभा थुम्जी

याम्बु । तामाङ छोरङान महिला समाजला ङहाच्छा साधारणसभा थुम्बा मुला । होजा साधारणसभासे फुबु याङजी घिसिङला चोहोदानरी म्हेत्तो चुख्रीला छार कार्यसमिति स्होबा मुला । कार्यसमितिरी ह्रोचोहो सुस्मा योञ्जन, गौराही माया डोल्मा लो, ह्रो गौराही प्रमिना रुम्बा, मुल्मीकादेरी निर्माला लामा, माया थिङ, सुनी रुम्बा, सुमित्रा घिसिङ, माइली लामा मुला । गेताङ निर्माला लामाला चोहोदानरी थुम्बा मुबा ।